Novidades

Pulp Books

Marzo 30th, 2011  |  Published in| the_category Internet, Literatura, Novidades, Tradución

Desde aquí ofrécese unha selección da literatura galega contemporánea máis recoñecida para o lectorado en castelán.

Raquel López Veleiro

Lectura horizontal: un ‘xiro’ no noso modo de achegarnos ao libro

Marzo 24th, 2011  |  Published in| the_category Novidades

Nas clases de Historia do Libro deste máster de Edición vimos como o libro foi un dos poucos inventos do home que “naceu perfecto”, é dicir, que desde a súa creación non precisou de melloras no esencial do seu concepto. De feito, desde hai polo menos 500 anos os libros preséntanse ante os lectores do mesmo xeito: un texto impreso sobre unha serie de follas que se encadernan por un dos seus laterais e que van protexidas por unha cuberta ou tapa.

Ata agora (e deixando a un lado os libros dixitais) a mecánica lectora era rematar a páxina esquerda e pasar á dereita, a cuxo remate se viraba a folla e comezaba o proceso de lectura esquerda-dereita. Pero o outro día Augus falou na clase da irrupción nos últimos tempos dun novo formato de libro que ten como principal característica que o lombo se sitúa en horizontal de modo que cada dobre páxina aberta é como se fose unha do dobre de tamaño; é dicir, o libro xírase 90 graos.

O primeiro libro neste formato é El mar en llamas, do prolífico Alberto Vázquez-Figueroa, publicado por Martínez Roca, unha das filiais de Editorial Planeta. Imaxino que a idea foi do propio Vázquez-Figueroa quen, ademais de escritor, xa amosou en máis dunha ocasión esoutra faceta de inventor. Polo visto, as vantaxes deste novo formato son múltiples:

  • Máis pequeno: asegúrase que se pode reducir ata nun terzo a cantidade de papel necesario para a impresión dun mesmo texto, xa que as marxes se aproveitan moito máis. Incluso o tamaño de letra é un 1 punto maior ca o estándar.
  • Máis ecolóxico: como consecuencia deste aforro de papel, o impacto ambiental dunha tirada é moito menor, se ademais temos en conta que se realiza en papel reciclado.
  • Máis barato: o libro de Vázquez-Figueroa (encadernado en tapa dura) véndese a un prezo de 16,90 euros, cando un volume destas características roldaría os 20 euros no seu formato convencional.
  • Máis cómodo: a luz incide de maneira máis uniforme na dobre páxina e evítanse reflexos e zonas escuras. Seica se pode ler cunha soa man, apoiando a tapa na nunha mesa, por exemplo.
  • Máis próximo ao formato dixital: o formato resultante desa dobre páxina reconvertida a unha soa queda a medio camiño entre o libro de toda a vida e os novos soportes electrónicos, onde tamén se traballa sobre unha única páxina.

O tempo dirá se é unha curiosidade que simplemente chama a atención polo seu carácter novidoso ou se realmente a idea acabará atopando o seu lugar nun mercado, como este do libro, que xa estaba de por si suficientemente alterado.

De momento, xa hai outra iniciativa similar: os librinos de Ediciones B. Héctor.

Eu son Balbino…

Febreiro 27th, 2011  |  Published in| the_category Novidades

Así comeza Memorias dun neno labrego, a novela de Neira Vilas que nestes seus primeiros 50 anos de existencia (publicouse por primeira vez en Buenos Aires en 1961) se converteu na obra en galego máis vendida e traducida a máis linguas. Non ten mérito ningún, polo tanto, que este fose o primeiro libro en galego que lin na miña vida, e probablemente (non o lembro con seguridade) o primeiro que lin en calquera lingua.

Este ano, co gallo do seu medio século de existencia, houbo algunha novidade con respecto a ela. Ademais do acto de celebración da efeméride (que acabou convertido nunha verdadeira homenaxe ao xa seu octoxenario autor), en xaneiro deste ano Galaxia presentou unha edición especial de conmemoración deste cincuentenario, e a finais de 2010 a editorial Kalandraka publicou unha versión en castelán, ilustrada por Xosé Cobas.

A obra chegou tamén aos escenarios da man de Candidó Pazó, creador e actor do espectáculo teatral Memoria das memorias dun neno labrego, que se está a representar por toda Galicia, e dirixida especialmente ao público máis novo. Con permiso de Lois Pereiro e Cunqueiro (de quen se cumpre o centenario do seu nacemento), este tamén ha ser, con todo merecemento, o ano de Memorias… Héctor.

Se Curros levantara a cabeza…

Febreiro 27th, 2011  |  Published in| the_category Novidades

Estes días estase dándolle forma a O divino ferrete, a primeira película pornográfica gravada en galego, e cuxo título (ao máis puro estilo do xénero) é unha manipulación lúdica do nome da obra de Curros Enríquez O divino sainete (parodia, á súa vez, d’A divina comedia de Dante).

No guión do filme colaboran autores do panorama literario galego (Diego Ameixeiras, Xabier Cid, Begoña Paz, Alejandro Tobar e Iolanda Zúñiga), que xustifican a súa participación nun proxecto deste tipo pola importancia que para a lingua galega pode ter encher este oco ata agora virxe do cine porno, no que a presenza do galego era nula. Que cinco escritores máis ou menos recoñecidos tomen parte no guión parece asegurar un argumento de calidade, acorde cun proxecto desta envergadura, que non busca o beneficio económico senón, segundo os seus responsables, “demostrar que a nosa lingua vale para todo”. Imaxinamos que se refiren ao galego.

Desde GalegoLab, coordinadores do proxecto, agardan que O divino ferrete comece a gravarse en abril e estea rematada antes do verán. A súa distribución realizarase de balde a través da Rede e baixo a licenza Creative Commons. Haberá dúas versións: unha de porno duro para os incondicionais do xénero e outra máis light, é de supoñer que para toda a familia. Así e todo, non se desbota a súa comercialización en DVD, en función do éxito acadado na distribución gratuíta.

A produtora do filme agradece todas as doazóns (de momento só económicas) que cubran os arredor de 3.000 € que prevén que se precisen como orzamento. Ía colgar aquí o tráiler da película, pero Youtube retirouno, evidentemente por incumprir a súa política de espidos e contido sexual. Héctor.

Indígnate!

Febreiro 23rd, 2011  |  Published in| the_category Novidades

Indígnate! é un pequeno libriño de arredor de 30 páxinas (un opúsculo, vin que lle chaman nalgunhas webs) de Stéphane Hessel, un escritor francés de 93 anos, antigo membro da Resistencia antinazi. Hessel pretende con este texto facer un chamamento colectivo, aínda que especialmente dirixido á xuventude, para conciencialos da necesidade de rebelarse contra a realidade económica, a inxustiza social e as políticas medioambientais.

A obra converteuse en todo un fenómeno social en Francia: Indigène Editions, a pequena editorial de Montpellier que confiou na súa publicación, fixo unha tirada inicial de 8.000 exemplares (todo un risco para unha empresa da súas dimensións) e acabou vendendo… máis de dous millóns! E actualmente está prevista a súa próxima publicación en máis dunha vintena de linguas. Entre elas, o galego, pois estes días sóubose que a editorial Kalandraka sacará a primeiros de marzo unha edición na nosa lingua, cun prólogo de Manuel Rivas. O seu prezo será de 5 euros. Héctor.

O camiño dos nosos esforzos (libro interactivo-2)

Abril 13th, 2010  |  Published in| the_category Libro dixital, Literatura_infantil_e_xuvenil, Novidades, Sen clasificar

Semella que tiña que ser a Alicia de Lewis Carroll o que, oficialmente, aportase a maxia e a fantasía ao mundo do libro electrónico. E tiña que ser no iPad de Apple, posible “KindleKiller” nestes decisivos momentos, en cernes do futuro da edición.

Alice for the iPad

Atomic Antelope

n.m.

O camiño dos nosos esforzos (libro interactivo)

Marzo 6th, 2010  |  Published in| the_category Creación _editorial, Editoriais, Internet, Libro dixital, Literatura_infantil_e_xuvenil, Novidades

Dúas propostas de publicacións interactivas por parte de El Mundo e de Penguin. Semella especialmente interesante a introducción da “realidade aumentada” da proposta de Penguin.

n.m.

“Todo va a cambiar” de Enrique Dans

Marzo 6th, 2010  |  Published in| the_category Dereitos de autor, Editores, Libro dixital, Novidades

“Todo va a cambiar é o manifesto no que Enrique Dans nos amosa o camiño que vai tomar a promoción cultural e de lecer cos avances tecnolóxicos dos últimos tempos. Prestade atención á xustificación que fai respecto da  publicación do  libro xa que é a primeira vez que o grupo Planeta lanza unha edición con “Creative Commons“, o que significa que os dereitos de autor son da editorial, pero o contido se pode usar con liberdade, con mención á fonte.

Jose Luis Mateo

Dicionario de onomatopeas

Febreiro 25th, 2010  |  Published in| the_category Cómic, Creación _editorial, Dicionarios, Historia do libro, Novidades

A aparición do Diccionario de onomatopeyas del cómic, autoría de Luis Gasca e Román Gubern, abre a porta a un paraíso para todas as persoas amantes da banda deseñada. Ofrece, no mesmo formato ca un dicionario, máis de 500 propostas de onomatopeas acompañadas dun exemplo en forma de viñeta. Moitas destas onomatopeas xa están establecidas como convención propia da linguaxe da historia gráfica. O seu uso podémolo estender a toda a literatura, pois recolle: sons non verbais de produción humana, sons de produción animal, sons producidos pola natureza, sons producidos pola interacción dun ser vivo e un obxecto e sons producidos por obxectos.

Carme P.