Música para ler

Febreiro 27th, 2011  |  Published in| the_category Sen clasificar

Música e literatura son artes que van da man de maneira permanente. E non nos referimos unicamente á conversión en cancións de textos literarios (case sempre poemas) ou a incluír un CD como agasallo nun libro cuxo contido estea relacionado dun ou doutro xeito co mundo da música.

Como vimos estes días na clase, tanto na charla con Marcos S. Calveiro (coincido con Silvia en que foi todo un luxo asistir a esa actividade do máster) como na interesantísima presentación realizada por Celia Torres sobre o proceso de creación literaria  desenvolvido por parte de Agustín Fernández Paz, a presenza da música ten unha enorme transcedencia durante o proceso creativo, mesmo para a conformación dos protagonistas, xa que os gustos musicais van ser un trazo definitorio da súa personalidade.

Se a creación literaria permite escoitar música ao tempo que se escribe, tampouco a lectura ten por que ser un acto silencioso. E para axudarnos, hai algunhas páxinas web que nos ofrecen suxestións sobre o tipo de música máis axeitada para acompañarnos mentres lemos, achegando unha atmosfera propicia e sen interromper a necesaria concentración.

A Fundación Alonso Quijano sacou ao mercado unha recompilación de temas que denomina melodias invisibles, música relaxante que os responsables da fundación definen como “notas e compases invisibles ao antollo dos oíntes, pero que permanencen nun aire que ficaría orfo sen a súa presenza” (ademais da pastelada de frase, o seu prezo é de 8 euros). Sen termos que facer gasto ningún, un grupo de usuarios de Spotify está creando unha listaxe de temas que reúnen as características idóneas para servir de fondo a unha sesión de lectura.

E a medio camiño entre estas dúas opcións podemos atopar este foro, no que os usuarios aconsellan a banda sonora ideal para títulos en concreto. Así, por exemplo, un lector do Silmarillion de Tolkien recomenda My Spanish Heart, de Chick Corea; e aínda máis alá, un namorado d’O gran Gatsby de Fitzgerald presenta unha listaxe de todas as cancións de jazz que aparecen citadas na novela como xeito ideal de ambientar a súa lectura.

Deste modo, se o libro resulta que non é o que agardabamos, polo menos poderá quedarnos o consolo de entrementres ter escoitado boa música: e que nos quiten lo bailao, poderiamos dicir (xa que falamos de boa música) en homenaxe á cantante galega que representará a España na edición deste ano do Festival de Eurovisión. Héctor.

Os comentarios están pechados.